Timersorneq, Ataqatigiinneq Peqqinnerlu

Anguniakkamut alloriarneq ataaseq

Qilaliarfimmi Sisimiuni apersortinnerit kisimik ingerlanneqarsimanngillat. Sunngiffeqalaarneq Børne Cup-ernermut atorneqarpoq, tassanilu meeqqat 200-rujut tungaannut amerlassusillit unammipput, Sisimiunilu Timersortarfimmi unamminerit 48-rut ingerlanneqarsimallutik.

  

SAK unammersuartoqarnissaanut pilersaarusiorluarsimavoq, unamminerit naatsorsuutigineqareersutut naligiiffiusimaqaat. Malunnartorujussuusimavoq unammiat timersornissaminnut tapersersorluarneqarsimasut, holdeqatigiilluarlutik assammik arsarsimapput, naak inuusukkaluaqalutik arsariaatsimut paasinnissimarpasissimaqaat. Assammik arsaqatigiilluarnerisa saniatigut ataqatigiinneri malunnarsimaqaaq. Klubbeqatigiinngikkaluarlutik imminnut tapersersoqatigiillutillu ikioqatigiissimaqaat. Unammersuartoqarnerani ikinngutit ilisarisimasallu nutaat pilersinneqarsimapput.

 

 

Unammianut misigisat nutaat ilagisimavaat timersorfimmi illersuisunik ulikkaartumi unammineq. Sisimiormiut unammiallu ilaqutaat tikillutik unammianut illersuiartortut Timersortarfik nuannersunngorlugu unammisitsisimapput, tamannalu unammiaq puigorallartussaagunanngilaat.

 

Børne Cup 2022 #AALASA-p aningaasaateqarfiannit tapiiffigineqarsimavoq. Illoqarfiup atuarfiisa ilaannut klubbit tamarmiullutik aggersarneqarsimapput, tassanilu ilaatigut nunanut allanut unammisartunut sungiusaasuusimasoq Johannes Groth saqqummiisimavoq, saqqummiinermini timersortartuuniaraanni nunanullu allanut unammisartunut sungiusaasuuniaraanni nerisassat eqqissisimaarnissallu pingaassusai saqqummiuppai.

Timersortartuaqqat ussernartorpassuit takkussuutinnginnerini peqqissumik inuuneqarnerup pingaassusaannik paasitinnissai pingaartorujussuuvoq. Timersortartuaqqammi pikkoreqaat unammerusussuseqaqalutillu, tamaattumik peqqinnerunissamut inuuneqarnissamut ambassadørissatut piukkunnaateqaqaat, taakkualu saniatigut taakkununnga pingaaruteqaqaaq paasitissallugu nerisassat eqqissisimaarnerlu atorlugit ajutoornerit qanoq ingalassimaartinneqarsinnaanersut timersornerlu qanoq pitsaanerusumiitsinneqarsinnaanersoq.

  

Saqqummiinerni meeqqat paasisinnaasaannik saqqummiisoqarpoq, U10-nut saqqummiinermi timimik aalatitsinerup pingaassusaa sammineqarpoq. U12-inut saqqummiinermi nukiit atorneqareeraangamik qisuariaatigisartagai, timip qanoq eqqissisimaartinnissaa kiisalu kulhydratit proteinillu timip eqqissisimaartinnissaanut takutitsilluarnissamullu qanoq atorneqarsinnaaneri saqqummiunneqarput.

 

 

 

 

 

Meeqqanuttaaq ersarissaatigineqarpoq, peqqinneq timersortarfiinnermuinnaq attuumassuteqanngitsoq, kisiannili ataatsimoorfinni assigiinngitsuni aamma ingerlanneqarsinnaasoq; soorlu atuarfimmi ilaquttalluunniit ilagalugit, tassa pisuttuarnikkut, sikkilernikkut imaluunniit pinngortitatsinni kusanaqisumi pinnguarnikkut assigisaannillu – minnerunngitsumillu aamma oqaatigineqarpoq ikinngutaalluarniarneq tassaasoq peqqissuseq. Taakkulu tassaapput Timersoqatigiiffiit Kattuffiata 2030-mut takorluugaannut, Nunarsuarmi timimik aalatitsinerpaanngornissamut, pingaartitat.

 

Saqqummiisoqareernerata kingorna atuartut timersortarfimmut nassarsinnaasaminnik namminneerlutik peqqinnartunik taqussiorput, taamaalillutik peqqinnanngitsunik pisiortornissaq pinaveersaartinneqarsinnaalluni.

 

Meeqqat tunniusimanerat tupaallannarsimaqaaq, suliniut iluatsissappat sungiusaasut aqutsisullu pingaarutilittut inissisimapput. Meeqqat nuannaarutigisaminnik #AALASA-mit tujuuluarannassimapput Paasisamillu merchaindaisinik aamma pissarsisimallutik. Ataatsimut isigalugu sammisaqartitsineq 2030-mi nunarsuarmi aalatitsinerpaanngornissamut takorluugaqarnermut attuumassuseqaqaaq!

 

Denne hjemmeside anvender cookies til at sikre, at du får den bedste oplevelse på siden. Læs mere her

Ok