Meeqqat inuusuttullu ajunngitsumik peqqinnartumillu sammisassaqarnissaat Apolloniep siuarsassavaa

Kalaallit Nunaanni Timersoqatigiiffiit Kattuffiat takorluugaqarpoq anguniagaqarlunilu Kalaallit Nunarput 2030-mi nunarsuarmi nunani aalanerpaaffiussasoq. Qeqqata Kommunia takorluugaqarpoq anguniagaqarlunilu peqataatitsisisumik meeqqat inuusuttullu avatangiiseqartinneqassasut, tassungalu tunngatillugu sunngiffimminni eqeersimaartumik pimoorussamillu sunngiffimminni inuuneqarnissaat siuarsaavigissallugu. 

Taamatut takorluugaqarlunilu anguniagaqarnerit tunngavigalugit kommune timersoqatigiiffiillu kattuffiat takorluukkat sulissutigineqarnissaat pillugu suleqatigiissallutik isumaqatigiissuteqarput piffissami 2022-2025 atuuttussamik aammalu sivitsorneqarumaarnissaa siunertarineqarluni. Isumaqatigiissut taanna novemberip aallartilaarnerani 2021-mi atsioqatigiissutigineqarpoq.

 

Timersoqatigiit kattuffiannik isumaqatigiissuteqarneq aallaavigalugu maanna Qeqqata Kommunia atorfinitsitsivoq inummik suliniutit timitalersorneqarnissaannik ataqatigiissaarisussamik aammalu anguniakkanik siuarsaasussamik, tassalu Qeqqata Kommuniani meeqqat inuusuttullu pitsaasumik peqqinnartumillu atugaqarnissaannut ikorfartuutaasunik inerisaasussamik.

 

Atorfinitsinneqartoq tassaavoq 34-nik ukiulik Apollonie Kreutzmann, ilinniartitsisutut ilinniarsimasoq, tamatumalu saniatigut Københavnip universititiani timersorneq pillugu immikkut ilisimatusarnermigut kandidatitut naammasserlaajusoq (kandidat i humanistisk samfundsvidenskabelig idrætsvidenskab).

 

Suliniuterujussuaq suliassartaqaqisoq suliassaminut piukkunnarluartup Apolloniap ataqatigiissaarilluni inerisaallunilu suliaralugu aallartisimalereerpaa. Suliniut annertooq aammalu attuumassuteqarsinnaasut tamaasa suleqatigilluarlugit, pingaartumik kajumissutsiminnik suleqataanermikkut siuarsaaqataarusuttut peqatigalugit ingerlanneqassaaq, anguniagaalluni meeqqat inuusuttullu imminnut tatigisut, qajannaatsut nukittuullu silarsuarmik misigisassarsiorusussuseqarluartut tunngavisseeqataaffiginissaat.

 

- Nalunngilarput sumiiffinni inoqarfiusuni, nunaqarfinni illoqarfinnilu, nammineq najuunneq aammalu peqatigiiffinni najugaqarfigisamilu susoqarneranik malinnaallunilu peqataaneq inuiaqatigiit aalanerulernissaannik suliniutigisatta iluatsissinnaanissaanut  isumalerujussuusoq. Taamaammat peqatigiilluta Apolloniemik atorfinitsitsinerput siunertaqarluarpoq, taassumami Kalaallit Nunaanni Timersoqatigiiffiit Kattuffiata suliniutaa aammalu Qeqqata Kommuniani sumiiffinni ataasiakkaani pisariaqartitat kissaatigisallu najoqqutaralugit ataqatigiinnerusumik timitalersuinissarput aqqutissiuutissavaa, Nuka Kleemann, Kalaallit Nunaanni Timersoqatigiiffiit Kattuffianni siulittaasoq oqarpoq.

 

Borgmesteri Malik Berthelsen (S) imatut oqaaseqarpoq:

- Qeqqata Kommuniani meeqqat timersornermik kajumissusillit akeqanngitsumik peqatigiiffinnut ilaasortaasinnaanerat periarfissaareerpoq, matumanili alloriarnermi, neriuutigaarput takorluukkat pillugit isumaqatigiissut aqqutigalugu meeqat inuusuttullu suli amerlanerusut iluaqutissinneqassasut. Kissaatigaarput angajoqqaat meeqqamik ingerlalluarnissaannik siunertaqarnerat tapertaaffigissallugu, qularinngilluinnarparpullu peqqinnartumik, eqeersimaartumik toqqissisimanartumillu sunngiffimminni inuuneqarsinnaanissaannut siuarsaaqataanerput meeqqanut inuusuttunullu iluaqutissiilluassasoq, assullu qilanaarpunga Apolloniep suliaminik inerisaanera malinnaaffigissallugu, soorunalumi neriuutigaara innuttaasugut suliniummut tassunga pingaarutilimmut tapersersuilluarumaartut.

 

Suliniut anguniakkanut tallimanut agguataagaavoq:

  • Peqatigiiffiit sunngiffimmi aallussisarfiit, suliffeqarfiit allallu attuumassuteqartut peqatigalugit meeqqat atuarfiaanniit sunngiffimmi periarfissanut ikaarsaariarneq pisariillisassallugu pilerinarsassallugulu.
  • Qeqqata Kommuniani kajumissutsimik suliaqarusussuseqarneq siuarsaavigineqassasoq tassuunalu ataatsimoortumik ataqatigiissaakkamillu sunngiffimmi periarfissat inerisarneqarnissaat qulakkeerniarneqassasoq.
  • Ataqatigiissaakkamik aaqqissukkamillu sunngiffimmi sammisassatut neqeroorutit inerisassallugit, periarfissat inerisarneqassapput meeqqat peqatigalugit aammalu sumiiffigisami periarfissarititaasut, nukittuffiit naleqartitaasullu atorluarlugit.
  • Meeqqat inuusuttullu amerlanerusut aaqqissukkamik sunngiffimmi sammisassanut peqataasartut amerlisarneqarnissaat sulissutigissallugu.
  • Ilaqutariinnut naleqqussakkanik peqataaffigiuminartunillu sammisassaqartitsineq inerisaaffigissallugu.

Denne hjemmeside anvender cookies til at sikre, at du får den bedste oplevelse på siden. Læs mere her

Ok