AIR GREENLAND-IP KALAALLIT NUNAATA 2023-IMI ARCTIC WINTER GAMES-IMI PEQATAANISSAA PINGAARNERTUT ANINGAASALIISUUFFIGAA

Sisamanngornermi 15. septembarimi Air Greenlandip aamma Kalaallit Nunaanni Timersoqatigiiffiit Kattuffiata Kalaallit Nunaanniit Arctic Winter Games 2023-mut, Canadami ingerlanneqartussamut peqataatitsisoqarnissaanut tapiinissaq pillugu pingaarnertut aningaasalersuinissaq pillugu isumaqatigiissut atsiorpaat.  

Ilaatigut isumaqatigiissuteqarnerup kingunerisaanik Air Greenlandip Kalaallit Nunaanniit peqataasussat, sinniisit isiginnaartussallu Kangerlussuarmut timmisartuutissavai. Tassanngaanniit imarpik qulaallugu timmisartoq Norsaq, Imarpik qulaallugu timmisartuussisartoq atorlugu Arctic Winter Games-it 29. januaarimi aallartinnginnerini naalagaaffiup ilaani Alberta-mi Wood Buffalo-mut ingerlateqqinneqassapput.

Isumaqatigiissut 1,7 millioner koruuningajannik naleqarpoq, taamaalillunilu ukiuni kingullerni Air Greenlandip aningaasaliisussatut isumaqatigiissutigisarsimasaani annerpaajulluni.

- Aningaasaliissutissat uku atorlugit Kalaallit Nunaanniit Issittumi timersornikkut kulturikkullu aaqqissuussaanerit annersaasa ilaannut peqataatitsinikkut inuiaqatigiinni akisussaaffitta ilaanik kivitsinissaq pineqarpoq. Nunatsinni timmisartuutileqatigiiffittut timersortartut inuusuttut naapissinnaanissaannut atugassiinissarput pingaaruteqarpoq, tassalu nunap iluani pissartanngorniunnerinnaat pinnagit, aammali nunat killeqarfii akimorlugit. Ikinngutitaartornernut pilersitseqataasarpoq, aammalu nunaqarfik, illoqarfik nunaluunniit najugaq sinnerlugu saqqummersinnaanermi siunertat annerpaartaat takusinnaagaanni timersornissamut kajumissutsimik siuarsaaqataasarluni, Air Greenlandimi niuernermut pisortaaneq Henrik Søe oqarpoq.

Kalaallit Nunaanni Timersoqatigiiffiit Kattuffiannit Air Greenlandimiit tapiissutit nuannaarutigineqarput.

- Air Greenlandip aningaasaliissuteqarnerani timersornermik piginnaanilittagut inuusuttorpassuit timersornikkut ineriartornerminnik nukittorsaanissamut periarfissinneqarput, kisiannili aamma inuusuttoqatitik nunanit issittuneersut allat Arctic Winter Games-ini sinaakkutissarpianik pilersorneqarlutik kulturikkut timersornikkullu avitseqatigalugit naleqarluartunik misigisaqartinneqartussanngorlutik.

Ataatsimoorfiit eqeersimaarfiulluartut taamaattut nalilerujussuupput – timersortartunut inuusuttunut – kisiannili aamma inuiaqatigiit ataatsimut isigaluta.

Air Greenlandimiit tamatumunnga tapersersorneqarnerput, aammaarlutillu Arctic Winter Games-inut pingaarnertut aningaasaliisuulluni timersornermut tapiinissamik aalajangiinerat pingaartittorujussuuarput, Nuka Kleemann oqarpoq.

Air Greenlandimiit isiginnaariartussanut bilitsinik tuniniaanissaq pilersaarutigineqarpoq.

Pilersaarusiorneq pitsaanerusoq
Arctic Winter Games 2023-mut atatillugu pingaarnertut aningaasalersuinissaq pillugu isumaqatigiissutip atsiorneqarneranut atatillugu illuatungeriit 2023-mi Kalaallit Nunaanni pissartanngorniunnissamut aamma Arctic Winter Games 2024-mut pilersaarusiornerit aallartinnissaat pillugu assammipput. Tamanna aamma Timersorneq pillugu Isumasioqatigiinnermi, ukioq manna maajimi Ilinniartitaanermut, Kultureqarnermut, Timersornermut Ilageeqarnermullu Naalakkersuisup Kalaallit Nunaanni Timersoqatigiiffiit Kattuffiat suleqatigalugu aaqqissuussaani qulequttatut sammineqarpoq.

- Silaannakkut angallassinermik inuussutissarsiuteqarnermi piffissaalluarallartillugu, sullitagut angalanissaminnut pilersaarusiorsinnaaniassammata pilersaarusiortarpugut. Pingaartumik ukiuni makkunani angalarusussutsip annertusinerani qaqugu qanorlu amerlatigisut pissartanngorniunnissanut peqataaniarnersut ilisimassallugu uagutsinnut pingaaruteqarpoq, taamaalilluta inissanik immikkoortitsisinnaagatta, aammalu akinik peqatigiiffinnut iluaqutaasunik aalajangersaasinnaalluta. Nalunngilarput, angalanissanut missingersuutinik akikinnerusunik piffissaalluarallartillugu saqqummiussisinnaagutta, piumassutsiminnik sulisut aningaasanik katersuinissamut taarsiullugu piffissartik sungiusaanermut siulersuisutullu sulinermut atorsinnaagaat, Henrik Søe oqarpoq.

Kalaallit Nunaanni Timersoqatigiiffiit Kattuffianniit peqatigiiffiit immikkut ittut tamarmik  ingerlaavartumik attaveqarfigineqarput, taakkulu amerlanersaasa 2023-mi nunatsinni pissartanngorniunnernut assigiinngitsunut pilersaarutitik tunniutereerpaat.

- Maannangaaq ukiup tulliani nunatsinni pissartanngorniunnissanut ullussarititaasut tunniussinnaagatsigit soorunami nuannaarutigaarput. Taamaalillusi Air Greenlandimi angalanissat pilersaarusiorsinnaalerpasi, aammalu Kalaallit Nunaanni Timersoqatigiiffiit Kattuffiata peqatigiiffiit pilersaarusiornerminnik ingerlatitseqqinnerini ikiorsinnaalerpai, tassungalu ilanngullugu timersortartunut inissiiffissat timersortarfiillu assigiinngitsut atorneqarnissaat siunertaralugu kommunit attaveqarfigineqassapput, Nuka Kleemann oqarpoq.

Illuatungeriit Arctic Winter Games 2024-mut, tamatumunngalu peqatigitillugu 2024-mi pissartanngorniunnissanut pilersaarusiornerit aallartinniarlugit qanittukkut ataatsimeeqqinnissartik pillugu isumaqatigiipput.

Denne hjemmeside anvender cookies til at sikre, at du får den bedste oplevelse på siden. Læs mere her

Ok