AASAANERANI TIMIMIK AALATITSINISSAMUT ISUMASSARSIATSIALAAT TALLIMAT
AASARPOQ, TAMANNALU ISUMAQARPOQ ORNITTAKKAT AMERLASUUT UNIKKALLARMATA. INUIT ILAAT AASARSIORLUTIK SULINNGIFFEQARPUT / ATUANNGIFFEQARPUT, ILIUUSERISARTAKKALLU NALIGINNAASUT SUNGIUSARTARNERILLU (INUIT ALLAT PEQATIGALUGIT) ALLANNGORALLARLUTIK… TAAMAAKKALUARTORLI AASARSIORNEQ ILAQUTTANUT PIFFISSAQARNERULERFIUSINNAAVOQ. AAJUKU ISUMASSARSIATSIALAAT, QANOQ ILLIT ILAQUTTATIT PEQATIGALUGIT AASAANERANI TIMIMIK AALATITSISINNAANERSUTIT.
1. ILAQUTTATILLU PISUTTUARITSI/ANEERITSI
Nerereernermi najukkap eqqaaniusinnaavoq, sissamut pisuttuarluni, takinerusumut qaqqamut imaluunniit allarluinnarmut.
Pisuttuarneq timimut tarnimullu peqqinnarpoq. Qaqugukkulluunniit pisuttuartoqarsinnaavoq. Kikkut tamarmik peqataasinnaapput, ukiutit timersortarnerlutilluunniit apeqqutaanngillat. Pitsorluttuugaanni aamma peqateqarluni aneertoqarsinnaavoq silaannarillu iluarusuffigalugu.
Ilaquttallu ataatsimut timimik aalatitsineq ataqatigiinnermik nukkassaasuuvoq, assigiinnik misigisaqarnikkut. Eqqartueqatigiinissarlu aneertilluni ajornannginnerusutut oqinnerusutullu misinnartarluni.
Ilaquttatit suli pisinnaappata, sungiusarnernik ilasinnaavasi. Imaluunniit pisunnissi akornasigut sukkatseqattaartunik arpannertalerlugit, uummatissi kassunneri sukkatsillattaarlugit.
2. PINNGORTITAMI PAASISASSARSIOQATIGIIGITSI
Uumasuaqqanik siuteqqunillu pinngortitami ujaasigitsi. Uumasut naasullu aqqutissinni naammattuukkasi misissorsigit eqqartorlugillu (meeqqanut/tamanut ilinniut). Pinngortitami ilutsinik sunut assingusunik qimerluuigitsi, soorlu ilulissani/sikorsuarni/innani, suusinnaanerinik takorluuillusi.
3. KAMMALAATIT ILAQUTTALLU QILUAANERMUT PINNGUAATERSORNERMULLU QAAQQUKKIT
Qiluaaffissanngorpoq, unnuillu qaamallutik takinerulernikuupput. Qiluaaneq ataatsimoorluni pinnguaatersornemik akoorsigit ataatsimoortitsinerulersumik. Uummammik kassutsitsinerulersumik aammalu "illartarnitta nukiinik" nukkassaasunik. Noqqoruukkitsi, arsaaqqamik unammillusi, ujaqqanik nakatarlusi, toqqorseriarluni ujaasititsineq, iligiikaarluni tulleriaalluni arpaliuunneq, pooqattanut ikeriarlusi sukkaniuullusi imaluunniit allatut pinnguaatersorlusi nuannersumik.
4. PINNGUARNEQ - MEEQQALLU
Aalalluni pinnguarneq torralluinnaavoq, ulluinnarmi timimik aalatitsinissamut. Aalalluni pinnguarnermi peqataagit. Meeqqannut maligassiuilluarit aalaqatigalugit; arsarlusi, pinnguartarfiliaqatigiillusi, attortaallusi, ujaqqamiit ujaqqamut pisseqattaarlusi, siallerpat; tatsini pississaarlusi, illup iluani: akisinik unammillusi il.il.
5. TATSINI NALUNNGUAARIT NALORAARILLUUNNIIT
Tatsit aasaagaluartoq nillersinnaasarput, tatsilli nillertut timi kininneratigut napparsimanerit akiussutissaanut nukkassaasarpoq, adrenalin qaffallugu, qiimmatsitsisarlunilu. Timi tamaat ikillugu nillertumik misigisaqarusunngikkuit alersitit peeriarlugit qarlitillu qummooriarlugit naloraarsinnaavutit.
