Ataatsimeersuarneq pillugu

Sooq ataatsimeersuarneq
ingerlanniarneqarpa?

Kalaallit Nunaanni Timersoqatigiit Kattuffianit takorluugaavoq, Kalaallit Nunatta nunarsuarmi tamani timimik aalatitsiffiunerpaajussasoq.  Ukiuni 25-ini kingullerni pualavallaartut amerliartuinnarsimapput 2018-imilu innuttaasut akornanni 27%-iusut pualavallaartuulersimallutik. Ikinnerusullu naliliipput, peqqilluarlutik meeqqallu amerlavallaat pitsaaasumik inuunngillat. 

Timimik atuineq allanngortitsisinnaavoq – tarnikkut timikkullu peqqinnerulersitsilluni aammalu ilikkagaqarsinnaassuseq pitsaasumillu inuunissaq eqqarsaatigalugit. Tamannalu annertunerpaamik ineriartortikkumallugu inuiaqatigiittut siunnerfigilerutsigu nutaanillu sinaakkusersuilluta, meeqqanut, inuusuttunut utoqqaanerusunullu pitsaasumik sunniuteqalersissinnaavarput.

Alloriarneq sammiviit suut tamaasa akimorlugit suleqatigiilluta tigusigu, taamallu isumassarsiaq timitalerlugu.

Ataatsimeersuarneq sunik imaqassava?

Ataatsimeersuarnermi itisilerissaagut, qanoq ililluta nunarsuarmi nunat akornanni timimik atuinerpaasunngorsinnaanerluta. Isumassarsiorfissaqqissunik saqqummiussuisoqassaaq, eqimmattatut sulisitsisoqarluni aammalu akuliusimatitsilluni ataatsimiititsinikkut oqallisigitinneqassapput iliuusissat timitalersuillunilu ingerlatsinissat, tamani siunertanerineqassalluni timimik atuisitsinerulernissaq, ataatsimoorussilernissaq aammalu nunatsinni tamat akornanni aalanerulernissamut kajungertitsilernissaq. 

Sumi qaqugulu ataatsimeersuarneq ingerlanneqassava?

Ataatsimeersuarneq Nuummi Hotel Hans Egedemi ulluni 14. & 15. november 2019 ingerlanneqassaaq.

Peqataaneq qanoq akeqassava?

Peqataarusuttut nalunaassapput peqataanissarli akeqassanngilaq.

Ingerlariusaa

Ataatsimeersuarneq uummaarissoq angusaqarluarfiusussarlu ingerlaassinnaajumallugu digitalimik tunngaveqarneq aallavigissavarput, sinaakkusersuinikkut peqataasut tamarmik uummaarissumik peqataanissaannik isumannaarinnittussaq. Siunnerfiupput eqimmattatut uummaarissumik tiguartinnartumillu sulinissat.

 

Saqqummiussuinerimmi qisuariarnissamut periarfissiinngitsut qaqutiguinnaq angusaqarluarfiusinnaasarput. Ilimasanillu paarlaasseqatigiinnissaq kissaatigigatsigu, Kattuffiup GIF-ip tungaanit oqallittarnissat piffissaqartilluarumavagut, sinaakkusersorlugilli ersersillugit suut sammiviit pingaartikkatsigit. Taamatut iliornikkut neriuutigaarput kikkut tamarmik nuannersumik misigisaqartinnissaat aammalu neriuutigalugu pilersissallugit oqallinnerit ataatsimeersuarnerlu ataatsimut isigalugu siunnerfilersugaalluarlunilu, imaqarluarlunilu angusaqarluarfiusussaq.

 

Tassa imaappoq, ataatsimeersuarnissaq sioqqullugu peqataasussanut ataasiakkaanut apeqqutit isummersorfigalugit qisuariarfigisassat nassiussuunneqassapput. Ataatsimeersuarnerullu ingerlanerani sioqqutsisumik gruppiliaareersut suleqatigiissinneqartassapput.

Peqataasunit utertitsissutigineqartut toqqaannartumik immersuutitut ataatsimeersuarnermi atorneqassapput kingornatigullu tamakku aamma GIF-imit pissarsiatut uuttorneqarsinnaasutut malersoqqitassatullu toqqortorneqassapput. Tamatumalu naqissuserpaa pingaaqimmat peqataasut ulluni ataatsimeersuartitsiviusuni marlunni akuulluarnissaat, pissarsilluarfiginerpaasinnaajumallugit isummersuutinik, misilittakkanik, ilisimasanik isumassarsianillu paarlaassueqatigiinnissamut periarfissaasut. 

 

Minnerunngitsumik GIF-imit neriuutigaarput akuliussuititsilluarluni allatullu ilusiligaasumik ataatsimeersuartitsineq, nuannersumik soqutiginartumillu ingerlanneqartutut misigisaqartitsiumaartoq – PEQATAALLUARISI! 

Kikkut ataatsimeersuartitsinissamut tunuliaqu-taappat?

Ataatsimeersuarnissaq Kalaallit Nunaanni Timersoqatigiit Kattuffiannit aallartitaavoq.

Apeqqutissaqartut saaffigissavaat Sonja Sørensen uunga allallutik:  konference@gif.gl

Denne hjemmeside anvender cookies til at sikre, at du får den bedste oplevelse på siden. Læs mere her

Ok